Пливањето е еден од најтешките, но и најздрави спортови за развој на телото. Тоа е рекреација која неверојатно позитивно влијае на здравјето на човекот.

Со пливање се забрзува аеробната физичка активност и во исто време се зајакнуваат сите мускули на телото.

Отпорот на водата, кој е 10 до 15 пати поголем од отпорот на воздухот, дополнително го зголемува ефектот на пливањето врз зајакнувањето на мускулите (како да вежбате со тегови). Пливањето го зајакнува кардиоваскуларниот систем, го регулира крвниот притисок, го продлабочува дишењето, го зголемува капацитетот на белите дробови и го подобрува снабдувањето на ткивата со кислород. Освен тоа, позитивно влијае на зглобовите, ја зголемува нивната подвижност и еластичност и позитивно влијае за координација на движењата.

Рекреативното пливање опушта, ја намалува анксиозноста и нивото на стрес и ја зацврстува целокупната мускулатура на телото.

На тој начин се троши и значително количество на калории: 60 минути пливање во слободен стил согорува 500 до 700 калории; 60 минути градно согорува 750 калории, 60 минути пеперутка 800 калории, додека 500 калории се губат со 60 минути пливање грбно.

За најдобар ефект се препорачува секојдневно пливање во траење од 30 минути. Ако тоа не е можно, одличен резултат ќе имате и доколку пливате три пати неделно во исто времетраење.

Ако не постои здравствена пречка, најдобро е да ги комбинирате сите стилови затоа што на тој начин се постигнува најдобар ефект и рамномерно се развиваат сите мускули на телото. Ако вашата цел е да ги развиете вашите рамена, грб и нозе се препорачува да пливате пеперутка. Овој стил што се однесува до синхронизирање на дишењето и движењето е најтежок.

ЗДРАВЈЕ

Краул е најпрактикуваниот стил на пливање. Ако пливате со брзо темпо ова е стилот кој се препорачува кога сакате да добиете аеробни ефекти. Градно е побавна техника на пливање која бара посилни нозе и рамена. Кога имате проблем со вратните пршлени треба да бидете претпазливи и најдобро е да се одлучите за грбно пливање. Овој стил се препорачува за оние кои имаат проблеми со кичма, болки лошо држење на телото, деформитети…

Доколку планирате да почнете да пливате, постојат основни работи на кои треба да обратите внимание. Важно е водата да не биде премногу ладна, посебно доколку имате акутно воспаление на мускулите, зглобовите или повреден нерв. Водата во базените се третира со хлор и затоа луѓето кои имаат одредени здравствени потешкотии (осетлива кожа, алергии) треба да внимаваат. Не треба да пливате после обилен оброк, но не треба ниту да бидете гладни, поради можни опасности од намалување на нивото на шеќер во крвта. Луѓето кои боледуваат од епилепсија, посебно ако не е доволно регулирана со терапија, мораат посебно да внимаваат, односно некој да биде покрај нив. Оние со недоволно регулиран дијабети исто така мора да се чуваат.

На лето се препорачува пливање во море поради бројните позитивни дејства на морската вода врз здравјето на луѓето. Во ладна вода не смеете да влегувате нагло, затоа што тоа може да доведе до стеснување на крвните садови и да предизвика кардиоваскуларни проблеми кај особи кои боледуваат од болести поврзани со крвните садови и срцето.

Истражувањата покажуваат дека пливање со мал интензитет позитивно влијае на високиот крвен притисок. Лесно пливање 4 до 5 пати неделно по 20 минути или 3 пати неделно по 30 минути се препорачува за луѓе со висок крвен притисок. На почетокот треба да пливате кратки должини со подолги паузи и со тек на време да ги скратувате паузите и да ја зголемите должината на пливање.

Голем број луѓе, посебно младите, имаат проблеми со низок крвен притисок. Нискиот крвен притисок не е опасен по здравјето како високиот, меѓутоа создава доста непријатности. Со редовно лесно пливање ќе ги зацврстите крвните садови, а со длабоко дишење ќе обезбедите дополнителен кислород за сите келии.

Секојдневното седење предизвикува бројни проблеми со кичмата. Некои од проблемите се условени само со лошо држење на телото, а други со дефинирани деформации на кичмата. Денес скоро 90% од населението има болки во грбот во акутна или хронична форма. За здрава кичма се препорачува грбно пливање додека градно и пеперутка не се препорачува поради многубројните движења во одредени делови на кичмата, како и поради положбата на главата и вратните пршлени кога пливате градно.

БРЕМЕНОСТ

Пливањето е одличен избор на физичка активност за трудници. Водата ја намалува гравитациската сила и штити од повреди, а хидростатскиот притисок на водата ја потиснува крвта од ткивото во венската циркулација. Умерената физичка активност во бременоста е корисна затоа што може да ублажи бројни потешкотии кои со себе ги носи бременоста: го смалува стресот, поволно делува во спречување на настанување на труднички дијабетис и го намалува чувството на тежина во нозете.

ДЕЦА

Пливањето позитивно влијае на психофизичкиот, но и на социјалниот развој на детето затоа што како и кај другите спортови, подразбира социјални контакти и дружење. Водата е идеална за деца затоа што овозможува слобода во движењата и чувство на леснина што за децата е многу важно. Освен тоа, развива основна моторика и придонесува за развој на когнитивните способности. Со оглед на тоа дека децата постојано се развиваат, пливањето за нив е уште поважно. Со пливање посебно се зајакнуваат белите дробови и срцето и се развива чувството за координација на движењата и самоконтрола. Освен тоа, пливањето позитивно влијае на сонот и спиењето, способноста за терморегулација и имунитетот.

СЕНИОРИ

Рекреативното пливање се препорачува и за постари лица затоа што за нив вежбањето има специфини ограничувања, а пливањето нема посебни контраиндикации, па може да се практикува до длабока старост. Со пливање срцевиот мускул станува посилен, а поради зајакнувањето на мускулите се продлабочува и дишењето со што келиите во организмот добиваат повеќе кислород што на постари години е многу битно. Нема оптеретување на зглобовите, се подигнува расположението и ја намалува депресивноста и тешкотијата кои се доста чести во староста.

ТОПЕЊЕ МАСТИ

Кај личности кои имаат индекс на телесна маса поголем од 25 или 30, пливањето е идеален избор за редуцирање на тежината. За разлика од другите спортски активности каде има големо оптеретување на зглобовите, кај пливањето телото привидно губи тежина и оптеретувањето значително се намалува. Со оглед на густината и отпорот на водата, се согорува голема количина на енергија. Освен тоа, потешките луѓе немаат проблем со одржување во вода затоа што масното ткиво е полесно од ткивото на коските и мускулите. За редукција на телесната тежина се препорачува лесно пливање со граден стил во траење од 20 до 45 минути најмалку трипати неделно или слободен стил. После совладувањето на овие чекори, се препорачува краул или грбно пливање.